ललितपुर, पुष १८ — चाइना फाउण्डेशन फर रुरल डेभलपमेन्ट (CFRD) ले ललितपुरको खोकनामा कृषि सीप विकास तालिम सुरु गरेको छ। स्थानीय आर्थिक विकासलाई सुदृढ गर्ने उद्देश्यले सञ्चालित यस कार्यक्रमले प्राविधिक सीपमार्फत तरकारी उत्पादनमा सुधार ल्याउने लक्ष्य राखेको छ।
विशेषगरी युवा र महिलाहरूलाई लक्षित गरिएको यस तालिमअन्तर्गत स्थानीय कृषकहरूलाई कृषि उपकरण र गुणस्तरीय बीउ समेत वितरण गरिएको छ। कार्यक्रममा हङकङका ३० भन्दा बढी स्वयंसेवक विद्यार्थीहरूले सहभागिता जनाएका छन्, जसले नेपाल र चीनबीचको जनस्तरको सम्बन्धलाई उजागर गरेको छ।
सीएफआरडी ले खोकनामा विगत पाँच वर्षदेखि महिला लघुवित्त, हस्तकला, तेल तथा क्यान्डी उत्पादन कारखाना, र विद्यालय खाजा कार्यक्रम जस्ता विभिन्न क्षेत्रमा सहयोग गर्दै आएको छ। संस्थाका राष्ट्रिय निर्देशक जोउ झिकियाङका अनुसारसहयोग प्राविधिक क्षमता अभिवृद्धिमा केन्द्रित छ, जुन दीर्घकालीन र आत्मनिर्भर विकासका लागि आवश्यक छ। उहाँले चिनियाँ स्वयंसेवकहरूको सहभागिताले आपसी सहयोग र सिकाईलाई बढावा दिने विश्वास व्यक्त गर्नुभयो।
ललितपुर महानगरपालिका वडा नं २१ का वडा अध्यक्ष रवीन्द्र महर्जनले सीएफआरडी ले विगत पाँच वर्षदेखि खोकनामा विभिन्न विकास पहलहरूमा सहयोग गरिरहेको जानकारी दिनुभयो।
सन् २०१५ को भूकम्पपछि राहत कार्यबाट नेपालमा सक्रिय भएको सीएफआरडी ले सन् २०१९ देखि सीप विकासका परियोजनाहरू सञ्चालन गर्दै आएको छ। यसअघि संस्थाले दक्षिणकाली र तारकेश्वरका कृषकहरूलाई प्राविधिक सहयोग उपलब्ध गराई तरकारी कतार निर्यात गर्न समेत सहयोग गरेको थियो। हालको तालिम सीटीईभीटी (CTEVT) सम्बद्ध संस्थाहरू मार्फत आधिकारिक पाठ्यक्रममा आधारित भई सञ्चालन गरिएको छ, जसले दिगो विकास लक्ष्य ८ (मर्यादित काम र आर्थिक वृद्धि) लाई समेत सघाउ पुर्याउने बताइएको छ।
